Alienum phaedrum torquatos nec eu, vis detraxit periculis ex, nihil expetendis in mei. Mei an pericula euripidis, hinc partem.

Blog

GARR / Kontni nan Kreyol  / Tit  / Aktyalite  / Migran  / « LETA DWE GARANTI BON JAN SÈVIS ETASIVIL AK PAPYE IDANTITE POU DYASPORA A »

« LETA DWE GARANTI BON JAN SÈVIS ETASIVIL AK PAPYE IDANTITE POU DYASPORA A »

 

Lè pitit peyi a ki aletranje bezwen regle papye rezidans, fè paspò, voye chache fanmi yo, eksetera, y al frape bab pou bab ak yon bann pwoblèm. Yo jwenn swa non yo pa t janm anrejistre nan Achiv Nasyonal, swa ki te mal ekri ; swa fanmi y ap fè demach vwayaj pou li a, pa t janm gen papye, eksetera. Pafwa moun sa blije peye gwo lajan pou fè jijman rapid pou jwenn yon papye yo bezwen an ijans. Zafè papye sa a konn lakòz Ayisyen/Ayisyèn nan dyaspora a pèdi pòtinite pou regle zafè rezidans yo, ak papye legal pou fanmi yo vwayaje. Li konn anpeche yo vin nan peyi a wè fanmi yo oswa pou patisipe nan yon seri aktivite.

Pou sa ki konsène migran-migrant ayisyen k ap viv an Repiblik Dominikèn, se yon kalvè y ap pase. Akòz yo pa gen dokiman ayisyen ki pou idantifye yo, anpil nan yo konn pa ka reklame dwa yo kòm travayè/èz lè yo viktim abi. Lè yo vin granmoun, yo pa ka travay ankò, yo pa ka benefisye pansyon paske yo pa gen okenn dokiman ki di ki moun   yo ye.

Jwenn papye, yon dwa fondamantal

Se yon dwa fondamantal tout sitwayen/sitwayèn genyen pou l jwenn nan men Leta peyi l, dokiman didantite kòrèk li bezwen. Se sa ki fè koze bon jan sèvis etasivil ak idantifikasyon nan konsila yo parèt kom youn nan gwo revandikasyon kominote ayisyèn k ap viv aletranje a genyen.

Rekòmandasyon GARR

Depi plis pase 8 lane, GARR ap mennen yon kanpay pledwaye ak sansibilizasyon pou Leta ayisyen garanti bay tout Ayisyen/Ayisyèn kèlkilanswa kote yo ye a, dwa pou non yo anrejistre kòrekteman nan rejis Leta, dwa pou yo gen yon akdenesans ak yon kat didantite.

Nan okazyon Jounen Nasyonal Dyaspora a, GARR kontinye ap mande Leta :
•    pou li pran an konsiderasyon yon seri peyi kote gen anpil Ayisyen/Ayisyèn ki gen pwoblèm papye tankou Repiblik Dominikèn, Giyàn Fransèz, Ziltik eksetera.
•    Pou Ministè Ayisyen k ap viv Aletranje yo ansanm ak Ministè Afè Etranjè antann yo pou mete anplas nan chak konsila oswa anbasad, yon sèvis idantifikasyon ak etasivil ki djanm.
•    Pou Palman ayisyen an ratifye Konvansyon Entènasyonal sou Pwoteksyon Dwa Tout Travayè Migran ak Fanmi yo.

GARR byen  kontan tande MHAVE anonse li pran kesyon idantite a oserye pou Ayisyen/Ayisyèn ki aletranje. GARR ap ankouraje tout jefò k ap fèt nan lòt enstitisyon ankò, tankou nan Achiv Nasyonal ki sèvi alèkile ak mezon transfè yo, pou soulaje dyaspora a nan demach l ap fè pou jwenn dokiman didantite.

Se poutèt sa, nan okazyon Jounen Nasyonal Dyaspora pou ane 2012 la, GARR deside kontinye travay sou tèm dokiman didantite pou Ayisyen /Ayisyèn ki aletranje yo, kom yon tèm fondamantal pou reflechi sou li.

Nan sans sa a, li deside reyalize yon jounen refleksyon sou tèm :
 
‘’ BON JAN SÈVIS ETASIVIL AK PAPYE IDANTITE
POU DYASPORA A ‘’

 Objektif jounen refleksyon sa a se: Sansibilize popilasyon an sou pwoblèm yon seri kominote ayisyèn aletranje genyen nan zafè papye idantite ; fè konnen jefò divès enstans Leta ayisyen ak òganizasyon sosyete sivil la ap fè pou ede Ayisyen/Ayisyèn nan dyaspora a rezoud yon seri pwoblèm y ap konfwonte nan zafè dokimantasyon; epi relanse yon apèl bo kote desidè yo sou desizyon yo dwe pran pou rezoud toutbon yon seri pwoblèm dyaspora a ap konfwonte nan zafè dokimantasyon.

 Pwogram selebrasyon Jounen Nasyonal Dyaspora a ap dewoule nan lokal GARR nan dat 19 avril 2012 soti 10è nan maten pou rive 2è nan apre midi.  

Jeudi 19 avril 2012

1-Sitiyasyon Dyaspora Ayisyèn nan an Repiblik Dominikèn ak nan Ziltik nan sa ki gen arevwa ak dokiman didantite (MUDHA+OIM ambassadeur Guy Alexandre)
   
Deba

2-Diferan inisyativ ki pran pou amelyore sitiyasyon Ayisyen/Ayisyèn k ap viv aletranje yo nan kesyon Dokimantasyon.

–    Pwojè MHAVE
–    Pwojè Achiv Nasyonal ak Mezon transfè yo
–    Pwojè GARR ak MUDHA
–    Pwojè GARR nan Aken ak Kolektif Ayiti Frans

Deba

3- Ekspozisyon dokiman sou Etasivil ak sou  Dyaspora a pandan tout jounen an.

GARR
19/4/12

No Comments

Post a Comment